Anem Òc ! Per la lenga Occitana ! Tolosa 31 de març de 2012

COORDINACION «Per la lenga occitana !»

Anem Òc !

Los occitans manifestaràn, las autras lengas tanben.

Aquesta manifestacion nos fa passar un nivèl de mai dins la reivindicacion. Serem pas sols. Las lengas que demandan una reconeissença se faràn ausir totas lo meteis jorn.

   Lo 31 de març que ven serà pas una manifestacion de mai mas una manifestacion plan diferenta de las que se debanèron en dempuèi 2005.

    Pel primièr còp, la mobilizacion dels que demandan la reconeissença dels drets per las lengas ditas regionalas serà multipla. De manifestacions e d'accions se debanaràn dins las diferentas regions que menan tanben un combat pel respècte de lor lenga.

   Las manifestacions passadas en favor de l'occitan an mostrat que de milierats de personas se podián recampar sus la question de la politica linguistica. Es per aquesta rason que los promotors de las autras lengas an desirat far quicòm lo jorn de la mobilizacion dels occitans.

Ja, lo còp passat pel 24 d'octobre de 2009, mentre qu'èrem 25 000 a Carcassona, mai de 5 000 personas s'èran acampadas per manifestar en País Basc.

    Aqueste còp, una manifestacion se farà lo 31 de març a Kemper en Bretanha pel breton e una autra a Baiona en favor de l'euskara. I aurà tanben una accion en favor del catalan lo meteis jorn a Perpinhan, una autra en Corsega, e i aurà tanben d'accions en Alsàcia e dins los territòris ont se parla creòl (Martinica, Reünion).

    De pertot partiràn de messatges cap als responsables politics e cap a la societat per dire que volèm una legislacion per donar un estatut a nòstras lengas.

    Nosautres occitans, la lenga dita regionala mai parlada sus tot lo territòri francés, devèm mostrar nòstra preséncia, nòstra determinacion e mostrar un còp de mai que sèm fòrça, que sèm una fòrça !

Anem Òc ! Per la lenga Occitana ! Tolosa 31 de març de 2012. 

Per ne’n saupre mai sus lo 31:

http://anemoc.org/

http://www.languesregionales.org/